Trátase dunha iniciativa aberta que invita a coñecer e experimentar o tesouro vivo dos barcos de traballo dos galegos. A tripulación é admitida sen outra esixencia ou condición que o seu propio interese pola cultura tradicional do mar. Cativo requisito para acceder ao mundo das dornas e aprender o comportamento único dos barcos banceados á escarva, e a boga con remo cruzado.

O experimentar, navegar coa vela ao terzo para arrimarse ao fil do vento tanto ou máis ca cos aparellos modernos; ou para apreciar a complexidade de panos entenados, ou de velas de cangrexa; para sentir a xenial adaptación do aparello de gran penol da Buceta, con martelo aferrado no puño de amura, ou certificar a arte da Gamela para a boga e vela, co seu medieval fondo plano. As opcións extendéronse de a pouco para a veloz Traiñeira de velas encascadas ou o bote de Ribadeo que lle planta desafío á vela latino-galega da Portela.

Dependendo da dispoñibilidade dos patróns e da afluencia de dotación, fixa ou eventual, saíron semanalmente dende un mínimo de tres embarcacións até oito no mesmo día.
Dúas medidas certifican a estas alturas o grande éxito da iniciación ao mar promovida dende os Mariñeiros de Bouzas: a afluencia crecente do voluntariado e a ampla atención que os medios de comunicación prestaron ás saídas semanais.
As persoas reunidas nos mércores ás 5 da tarde á porta da Asociación de Mariñeiros, dobraron en número cada ano e son de procedencia a cada cal máis variada: Barcelona, Madrid, Málaga, Granada, Irlanda, Estonia e Letonia, Inglaterra (entre eles, un navegante profesor de Filosofía da Universidade de Essex), Bretóns interesados polo tesouro dos barcos galegos, despois de sucesivos desembarcos nosos en Brest; outros viron de Italia, Arxentina, Perú, Colombia, e naturalmente moitisimos Galegos.

Os medios de comunicación resaltaron a excelente resposta popular á convocatoria e gabaron a aparente facilidade coa que persoas de diferente idade e procedencia estreábanse na navegación a vela. Tamén repararon no feito de ser unha iniciativa verdadeiramente aberta, sen contrapartida económica (tanto dos usuarios como das Administración que nada achegan a esta empresa de interese público) así como a disposición da Asociación de Mariñeiros por iniciar na navegación tradicional ao alumnado de institucións de axuda como Alborada e Arela. As saídas dos mércores foron noticia en medios impresos, Radio e TV.

Así é como Francisco Fernández Rei gusta de chamar ó antropólogo Staffan Mörling, o que despois de percorrer toda a costa Galega  entre os anos 1964 e 1967 para recoller información, fotografar e facer planos dos barcos dos galegos, en 1989 publicou “As embarcacións tradicionais de Galicia“, obra que dignificou os barcos dos pobres e que foi fundamental para o desenrolo do movemento de recuperación do patrimonio marítimo galego. Ademáis, Mörling sempre estibo disposto a botar unha man onde se lle solicitara.

Esta maña o Profesor de Historia e Cultura Naval visitou o pantalan de embarcacións tradicionais de Bouzas, onde foi recibido polo presidente da asociación e outros membros da mesma, e recordou perfectamente cando nunha das “Semanas do Mar” organizadas pola asociación impartiu unha conferencia. Xunto con el desprazouse a Bouzas  unha televisión de Cataluña que está en Galicia facendo un traballo sobre os barcos galegos, a cal entrevistouno e filmou no pantalan mostrándose moi interesada nesta iniciativa. Tamén recibimos as felicitación de  Mörling, o que para nos foi toda unha honra e agradecemos súa presenza ó sueco de Beluso.

[Show as slideshow]

O vindeiro SÁBADO 24 DE SETEMBRO, nosa asociación organiza o XIII concurso de pesca dende embarcación en modalidade libre. Este concurso esta aberto a todos aqueles que queiran participar e cumpran as normativas, sendo o horario do mesmo o seguinte:

Data: 24 de setembro.

Lugar: pantaláns da asociación.

Hora de saída: a partir das 8 da mañá.

Hora limite de recepción do peixe: as 16,30 no local da asociación.

As inscrición estarán abertas ata o día 23 ás 20 horas no local da asociación. No momento de inscribirse se fará entrega das bases e normas que rexerán o concurso, e a entrega de premios farase a partir das 20 horas. Haberá premios para os 10 primeiros clasificados, para a peza de mais peso, e para o lote de pezas mellor presentado ó xurado; haberá tamén un sorteo de agasallos se a organización consegue doazóns.

E quizais o máis importante será que coma en anos anteriores, coa doazón de parte das pezas capturadas, farase para os participantes no concurso unha fritada mariñeira, e se se pode unha caldeirada,  que degustaremos despois da entrega de trofeos.

Moita sorte a todos os participantes!

[Show as slideshow]

Estivemos navegando polos mares da Póvoa, con dúas embarcacións de Bouzas, encantados de participar nos 20 anos do proxecto de recuperación da Lancha Póveira do Alto, un encontro que contaba cun amplo programa que incluíu regatas, conferencias,  a inauguración dunha exposición,  e unha sesión de poesías dedicada a Manuel Lopes, un dos grandes responsables da consecución deste proxecto.

Noso amigo Manuel, o antigo director da Biblioteca Municipal Roxa Peixoto, principal impulsor da lancha, foi recordado dunha forma moi especial o  sábado pola noite  na sesión do Memorial Manuel Lopes, onde quedamos abraiados pola forza do homenaxe e sorprendidos pola actuación do tripulante da lancha José Peixoto na guitarra, o periodista que nos dedicou varias crónicas a asociación de Bouzas.

Nós non podiamos faltar a este homenaxe, xa que Manuel Lopes ademais de ser moi querido en toda Galiza, os de Bouzas o recordamos con moito agarimo, xa que foi precisamente na II XUNTANZA DE EMBARCACIÓNS TRADICIONAIS DE BOUZAS, celebrada no 2006, o ultimo viaxe por mar de Manuel, quen navegou dende a Póvoa ata Bouzas na Lancha, e  á volta por terra, por motivo das súas doenzas.

A Federación Galega participou activamente no homenaxe, como podedes ver na súa paxina. Deixámosvos debaixo o ultimo parrafo da intervención de Dionisio Pereira no homenaxe a Manuel Lopes:

“Por iso, Manuel e Octávio forman parte da nosa historia e nos acompañan en cada paso que damos. E tamén por iso, na medida en que actuemos e sexamos consecuentes coa nosa raigame e cos nosos sinais de identidade máis queridos e máis distintivos, Manuel Lopes e Octávio Lixa Filgueiras permanecerán vivos connosco.

“In memoriam”. Na súa memoria.”

[Show as slideshow]