Asociación de Mariñeiros Artesanais e Deportivos San Miguel de Bouzas » General

A visita do Colexio Randufe de Tui, inagura a tempada no pantalán dos barcos Tradicionais

Corso — Mon, 21 May 2012 16:01:24 +0000

O primeiro pantalán da península Ibérica dedicado exclusivamente os barcos tradicionais, o peirao que a Asociación de Mariñeiros mantén a diario en situación de revista na dársena de Bouzas, abriu a tempada de visitas coa chegada do colexio Randufe de Tui.

A dirección do Colexio Randufe quería dar aos seus alumnos a oportunidade de apreciaren o museo real da diversa e imaxinativa cultura mariñeira de Galicia. Asociados e directivos deron explicacións aos rapaces interesados nos saberes do mar, o alumnado aprendeu que os barcos tradicionais encerran na súa fasquia, a historia viva da intensa relación dos galegos co mar.

As explicacións sobre o pantalán, completáronse cunha práctica de cabulleria e da arte dos nós.

Durante o ano 2011, nos meses de verán e nun horario de 16,30 a 20,30, este pantalán foi atendido para servizo publico e contabilizou moitas e moi variadas visitas. Dependendo do tempo, houbera días entre semanas con 40 visitas e nalgún caso ata 50 persoas. Nos fins de semana, e especialmente os domingos, as visitas superaron as 100 persoas. Domingo 17 de xullo, o pantalán deu para un aforo excepcional de 126 persoas.

Guerra contra a contaminación no areal do Adro

Corso — Mon, 07 May 2012 07:43:26 +0000

Para unha beiramar coma a do Adro que está afeita a ver todo o ano a manobra do Racú, o izado do penol da Dorna, a voga sen estela da gamela ou o lecer dos banistas, é un cambio de paisaxe observar como saen do mar ferros vellos, bidóns de vinilo, botellas e botellóns, plásticos enlamados, rodas, nasas perdidas, cabos de propileno, aparello eléctrico e todo canto vai da terra para o mar.

Sábado, o voluntariado da Asociación de mariñeiros ergueu do areal e do fondo case dúas toneladas de material alleo ao mar para o seu ciclo natural. Neste labor contamos coa axuda inestimábel do grupo sub-acuatico dos Bombeiros de Vigo, dos mergulladores da Policía Nacional, mergulladores de Montañeiros Celtas e de homes e mulleres amigos do mar como Santiago, Sergio e Ricardo.

O izado dos incordios de maior peso requeriu de aparellos improvisados sobre a pasarela no entanto outras mans discriminaban sobre a area bolsas de plástico, filtros de cabichas esmagadas e lixo polimérico e de látex de todas as procedencias. Tripulacións de apoio da Asociación de Mariñeiros meteron horas para recibir dos mergulladores pezas sorprendentes da contaminación.

A Asociación de Mariñeiros levou a cabo a limpeza integral do pantalan de barcos tradicionais. O concello emprestou seis carretillas, angazos e legóns, tamén a Autoridade Portuaria colaborou co evento.

Nas brigadas de limpeza comentaban a abundancia na beiramar e no areal de pequenas bolsas de plástico, arrastradas polo vento dende a paisaxe desolada que queda despois da feira dominical no recheo. A prevención de este semanal descoido axudaría a conservar a beiramar e reduciría o traballo de recollida.

Xornada de Traballos e Medio Ambiente mariño

Corso — Sun, 15 Apr 2012 21:02:20 +0000

Encadrado no programa de actividades, o vindeiro sábado 5 de maio a partir das 9,00 da maña, a nosa asociación dedicará o día ó medio ambiente mariño. O igual co pasado ano, estanse a organizar distintos equipos para, uns por terra e outros por mar, co apoio de submarinistas, deixa-la zona limpa de restos de barcos séme enterrados, cabos, plásticos, madeiras ou calquera outra cousa que non pertenza o mar. Todos os socios e colaboradores estades invitados a participar nesta xornada.

Barcos de Bouzas en Brasil

Corso — Wed, 11 Apr 2012 09:22:54 +0000

No ultimo Encontro de Barcos Tradicionais da Federación celebrado en Carril, visitounos o defensor da Cultura Marítima Brasileiro Luís Antonio Vellez, e entre as moitas fotografías que tomou, escolleu para a portada da revista Brasileira “Velejar” unha fotografía da dorna “Nova Froiña” navegando nas augas Carrileiras, así, que ai temos o noso Alberto Montenegro, navegando por todos os rincons de Brasil a onde chega a revista. Si ides o seguinte enlace podedes ver a magnifica fotografía. http://acddorna.org/blog/blog.php?id=588

Temos faena para todos

Corso — Thu, 22 Mar 2012 15:59:59 +0000

Despois de reparar, pintar, e renovar patentes, xa botamos dous barcos o mar listos para navegar, e agora mesmo temos tres en terra cas faenas de pequenas reparacións e mantemento, así que xa sabedes ai chollo para todos, pero non vir ca roupa dos domingos.