As velas de Bouzas participan do éxito dos barcos tradicionais no mar do Freixo

O grande encontro dos barcos nosos é o que promove cada 2 anos a Federación Galega pola Cultura Marítima e Fluvial (FGCMF) que na segunda semana deste mes de xullo do 2013, escollera O Freixo (Outes), síntese mariñeira nos estaleiros de vela e motor, nos areais mariscadores, nunha longa tradición de mar. A Asociación de Mariñeiros de Bouzas participou no XI Encontro con esloras grandes e pequenas e aportou activo traballo voluntario en todos os eventos do programa.

A participación popular deu réplica á do encontro anterior en Muros, tanto na rotación de embarques de cativos e maiores como na asistencia veciñal. O rodame do galeón Coruxo partía en dúas ondas o mar da Bogalleira, dende Taramancos, a Barquiña e a Broña; A Oleira escoraba nunha poderosa refolada sobre o mar rubio do lombo da Misela, con toda a vela arriba; o traiñon Vigo Cinco levaba as dúas relingas encascadasa fil de vento, a dorna Falucheira embarraba o pé da ostaga nunha orzada e deixaba ver de lóstrego o brillo do macho do leme.

No sol da tarde, o mar do Freixo era un teatro das velas observado dende os anfiteatros visitadísimos dos areias. A quilla poderosa do Fé em Deus povoense tamén desafiou con pericia o Lombo e outra tanto fixeron os de Esposende co seu Santa Maria dos Anjos. As finas velas bascas, a gamela coruxeira, dornas de tope, bote de relinga, dornas da illa e de Ribeira e o bote da Portela, nacido no Freixo, completaban a escala dos barcos.

Os sempre interesantes debates sobre os barcos tradicionais, escoran sobre a banda administrativa, legal, construtiva ou técnica e deixan ao aire o pantoque da importancia patrimonial, polo demais ampliamente recoñecida polo público que asiste aos Encontros. Escoitamos de novo a pregunta de se as embarcacións tradicionais son cultura material ou inmaterial. Unha disputa xa resolta no abrente da Xeración Nós (1920) que colocaba os barcos históricos, destilados e entregados pola tradición, como parte importantísima da nosa forma de viver o mar, da mesma maneira que pedras lavradas do alto medievo contan o noso pasado e por iso as conservamos coma tesouros, coa diferenza notábel de que os barcos da tradición ainda pasan o mar e ben gallardos.

As demais ilustracións do programa do XI Encontro medíronse coa importancia fundamental do programa, que está sen dúbida na navegación e na iniciación de milleiros de tripulantes de todas as idades. Na sexta, o teito da carpa grande case remonta o vóo coa Terbutalina, banda punk muradana e Sés, a cantante coruñesa co Xenio Destrozado (título do seu traballo último) A tradición das velas dialogaba cos golpes ao pentagrama do grupo local The Wayfarers. No lugar de honra do programa,

Son de Seu concentrou no Freixo o seu coro de cantareiras que algunha navega en Bouzas, harpas , zanfonas, corda, parches e gaita tumbal e levou a entrega visibel do público.

 

 

 

 

 

 


Unha resposta a “As velas de Bouzas participan do éxito dos barcos tradicionais no mar do Freixo”

  1. Carlos dice:

    Con este comentario, ratificar lo que se refleja en el artículo, pues como tripulante en uno de los barcos que desplazó la Asociación de Marineros de Bouzas, he podido constatar una gran organización de este evento, tanto en tierra, con muchas actividades de día y noche, como en el mar, teniendo en cuenta las muchas embarcaciones que se dieron cita en El Freixo.

Deixa un comentario