A Regata de Porto Meloxo

A quilla chantada na area, o leme no corredor, o pau seco, o proel a bordo e o patrón en terra listo para botar a correr praia abaixo ao toque da bucina. Deste xeito se preparaban as 15 dornas que o pasado sábado 28 de setembro participaron na última edición da regata de Porto Meloxo; a terceira da tempada que organizan os Amigos da Dorna Meca do Grove.

A pesar da predición de encalmadas, unha airexa suave pero constante acompañou a proba dando arrancada suficiente á frota para completar unha volta e media ao percorrido previsto.

A Madorniña, representante habitual de Mariñeiros Bouzas na competición dorneira, aproveitou a ocasión para poñer a proba algunhas mudanzas no aparello; con mal resultado, pois cruzou a liña de meta en penúltima posición.


Sen comentarios

Bouzas na regata do Camping Miami

Os patróns  da Madorniña, ademais de regatear moi ben, nos regalan a crónica da regata.  O verán xa vai tocando ao seu fin, pero a competición dorneira aínda ten citas pendentes. A última en se celebrar foi a sétima edición da Regata Cámping Miami, organizada polos Amigos da Dorna Meca e o campamento que lle dá nome.

Un total de 12 dornas polbeiras medíronse nas augas de San Vicente do Mar, con mar calmo e brisa mainiña constante que impulsou ás embarcacións entre Pedras Negras e a Lanzada para finalizar tras dúas voltas na praia de Area da Cruz.
Mariñeiros Bouzas enviou á súa representación habitual e a Madorniña que conseguiu facer sonar a bucina en quinta posición, mellorando o resultado do ano pasado.

Nesta ocasión, ademais da desbordante hospitalidade do Cámping Miami que agasalla aos participantes con unha copiosa cea e durmida nas súas instalacións, a asociación organizadora quixo recoñecer o esforzo realizado polos nosos tripulantes para non perder unha regata a pesar da distancia, facéndonos entrega dun precioso trofeo que xa se encontra nas vitrinas de Mariñeiros Bouzas.


Sen comentarios

A Madorniña na Regata do Sepelo

A competición dorneira tivo unha nova cita o pasado fin de semana en Portonovo coa XI edición da Regata do Sepelo, que cada ano organizan os Amigos da Dorna. As tripulacións congregáronse ás 4 da tarde do sábado 31 para dar dúas voltas a un triángulo balizado ante a punta que dá nome á regata. A predición meteorolóxica, con refachos de perto de 20 nós, levou á organización a decretar a obrigatoriedade de tomar un rizo durante a totalidade da proba.

Sobre o terreo, o vento fixo que a frota dorneira tivese que esforzarse ao máximo, rolando e cambiando de intensidade constantemente. Foron moitos os que sucumbiron a este escenario tan esixente, obrigados a orzar para compensar as repentinas escoras, a realizar viradas imprevistas cando un role fixo perder a derrota planeada ou simplemente freados nas calmas pola redución do trapo. A representación de Bouzas estivo composta pola Madorniña, que cruzou a meta en duodécima posición.


1 Comentario

Concurso de Pesca 2019

                                                                        

Estimados socios e non socios, como cada ano o próximo  SÁBADO 7 DE SETEMBRO DE 2019 organizamos o noso particular  XX CONCURSO DE PESCA DENDE EMBARCACIÓN EN MODALIDADE LIBRE.  Esta competición esta aberta a todos aqueles que queiran participar e cumpran as norma.

Dende aquí vos animamos a que vos inscribades.  No momento de inscribirse farase entrega das bases e normas que rexeran o concurso co cadro das puntuacións. Haberá importantes premios doados polos patrocinadores. Os veteranos xa sabedes que si hai peixe faremos unha fritada mariñeira PARA OS PARTICIPANTES NO CONCURSO


Sen comentarios

Seguindo as tradicións

Seguindo cas tradicións, mariñeiros Bouzas enfilou a proa de cinco barcos rumbo norte para participar na Xuntanza que cada ano fan os colegas da Asociación A Reiboa de Combarro, como saímos de maña, tivemos que parar a repoñer forzas na Illa de Ons, onde Pepe o do Checho nos informou que en setembro habería unha visita de barcos tradicionais a Illa.
Despois de comer puxemos rumbo leste ca intención dar velas e navegar co vento ata o pobo dos piornos a beira do mar, pero en vez de vento o que tivemos foi unha borralleira que non, nos deixaba mirarnos uns barcos aos outros.

Nas fotos, que poucas fixemos, podedes ver parte da flota de Bouzas navegando rumbo a Combarro, xa amarrados no pantalan e tamén poucas navegando, xa que na navegación do sábado a tarde que este ano estivo ben bonita, os de Bouzas non fixemos fotos.


Sen comentarios